From: http://www.un.org/esa/socdev/unpfii/en/declaration.html


Manchismanchunga manbiijee dewa'dila.
Chachillanu keenamu rukula


Alemania, Bélgica, Bolivia, Costa Rica, Dinamarca, Eslovenia, España, Filandia, Grecia, Guatemala, Hungría, Letonia, Nicaragua, Perú, Portugal, y República Dominicana: Naakenu ke'ba tsatse'wara.


Indigenala naaju deechu tadeeñuba Naciones Unidas kuinda faawara.

Wa'di' kuinda kenunu.


Tsadetiñu juntsanu kera' naadetiñuba chachilla'mitya keenamula mancha'lura manchistaapallu maluchi junio chu'chayachi paimii manchishmallu añuchi, ( 29 de junio del 2006) bale rukula entsa paatenu tsandinuu juñu tsadetive Naciones Unidas juushu juntsaa indigenala bian deechu tadeeve ti' pave.


Tsadetitu juntsanu demanbatu 61/178, de 20 de Diciembre de 2006, depaviikitu kayu tsai shuwaimujchiren, urake dekera' bene faawaañuuve detive, tsejtaa tsai dewa'ditu kuinda deke' akawadekive.


Tsejtaa Naciones Unidas, entsandi pa' shuikive, indigenala bain tsaren deechu tadeeve ti' depave.


*Tsangitaa manen juntsa kuinda demafaawareve.






















INDIGENALA NAAJU DEECHU TADEEÑUBA NACIONES UNIDAS, KUINDA FAAWARA.

Wa'di' kuinda kenunu.


Naciones Unidas-sha puma bale rukula main kiika dekive, tsejtu juntsa kiikanu naatiñuba entsangenuu juve detive.

Tsaañu'mityaa tsadetive indígenala bain kumuinchiren paree judeeve ti' depave, tsejmitya chachilla naadejuñuba firu'pandetyu.

Tsenmiren chachilla' chunu tena, judeeshu juntsa keetala tinbu kusas tsunanu tenashu juntsaya jundala kumuinchi yashkikeyanu juve.

Tsandikeenu juve titala keengen chumu deju’ba juntsa kayu urave tinu dejutyuve naaju chachillaba, juntsa dyusapaa kayu puya uraa tyandejutyuve, Tsandimu chachillaya na'baasa pan chumulaa tsandinu dejuve.

Tsandikeenu juve, indigenalaba deechu tadeeve, tyeengenu detya’ba, muba firu'pan chun dejutyu.

Entsaanu pamiya kaspee tinbunu indigenala judeeshu juntsala tsamantsa lastemai depuive, fabaa rukula lala' tusha devijatu, tsaa lalanu tu dechipakimu deeve kayu vera bian, tsagimuwa deeñu'mityaa naake' uraj chuntsaa tikeyamuwaave lala naaken chundenñuba tsanginu jukeyatyu.

Tsaañu'mityaa tsamantsa daran manaste ive, dekuinda kesne' naaketaa ura'chunuu juñuba juntsa paatetala detengaapunu, tsange' chachiitala ura’ dechunu tyeengenchu deju’ba, tsangetaa tu juushu juntsa, chi paate kayu vera bain lalaachi deeve tin detsuyu.

Kamanbaate tsaren meneste juve, chachilla’ tenatala entsaave ti’ wainnu, lala’mitya entsaa dekiñu’mitya, Uñinu tsandikeyanu juve naajuñuba tsange shiikanu.

Indigenaatala narai debuudi’ chunuu juve, tsadenashu juntsaa tikenu ke’ba ajkesha ura’ ke’ jinu dejuyu, naajulaba mas bulla kenchun dejutyuve vee chachi juulaa, naa nuka dechuñuba.

Tsangishu juntsaa lalaren laatene demandagen chudi’ ura’ chunu detsuyu tikeyanu juve. Lalaren naaketaa narai chunuu juñuba deshiikarenu ajkesha jinu.

Tsejmityaa lala naaken chumu deju’ba juntsatala demagera’ detala’ jikeyanu juve, firu’ talai mujchiren tikenuu juñuba urake talanu jukeyave, chipaate, tupaate pi paate juula bain.

Tsadekive, indigenala’ chunu tenatala, suutaduulanu demangalaa dekive, tsadekiñaa ura’ chunu dejuñu’mitya, chachilla jeepensa chunjutyu, kumuinchiren tukuraa ura’ chunu.

Tsandikeyanu juve, kumaniila bain indigenala’ chunu tenatala bain tsaren deechu tadeeve, debuudi’talainu : tinaaju awakaakenuu ju’ba, kiika mijanu paate, kaillala’ mitya ura’ kenchunu, tsenmiren keetadinu kaillalanu.

Indigenala’ paate padetishu juntsanu naatipa’ deshuwañuba kayu ura’ magikinuuba jushu juntsaya balela, indigenalaba depa’ entsaginuuve detinmala junu bale pumula ura’ mannu dejuve.

Tsaañumitya entsaginuuve detishu jundala naatii depa’ba tsangenu dejuve. Naakenu ju’ba tsangeshu juntsaa indigenala Uniba ura’ tinu dejuve.

Tsangenuu juñu Naciones Unidas, main kiika ke’ faawaave, entsange, taatu dekitu, lushi paate, pebulula’ mitya , naake keengen chumu deeñuba juntsa paatetalaa depave, tsaañu’mityaa kumuichi pebulula naakenchunu tya’ba pude deeve deti’ depave, entsa kilaya tsamantsa urave tya’mityaa tsadekive, muchiba na’baasa firu’ pakayanchun jutyu chachilla.

Entsa, challa kiika pillaashu juntsanu naatiñuba, muba urajtuve ti’ panu pude’detuve, chachilla deechu tajturen tsandindetsuve tin dejutyu, yumaa tsaa balela depiike’ detsuuñu’mitya.

Tsaañu’mitya yumaa lala’ pebulula bain juntsa deechu tadeeve tyandetsuve, Naciones Unidas, kikinshu juntsa paate, indigenala, Uñiba ura’ junu detuve. Yumaa lalanu balelainuu kiika juñu’mitya. Na’baasa firuke’ wapaanden chun dejutyuve.

Tsandikeyanu juve Uñinu bain baleruku chumulanu bain, enu naatiñuba delenge’dekera’ indegenala’ chunu tenatala taawasha kenu dejuve tikeyanu tsuve. Tsenmiren tyeengenu deju’ba pake’meenu detsuve chachillanu.

Naciones Unidas, juushu juntsaya tyeengenduba entsaayaa kindetsuyu ti’ kuinda ke’ tengaapus nenu juve, tsenmiren tsadinu tsuve, challa indigenala bain tsaren deechu tadeeve tinu tsuve tu kuraa.

Tsaañu’mitya entsangenuuve ti' padetishu juntasanu, main kasa kiika juuñuu dekishu juntsa tsamatsa urave, lala’ pebulala’mitya , kaspeetsaa chunu tinbutala tsaa machutyu’ bain jayaa ura’ jukeyanu juve, Naciones Unidas keenanu juñu’mitya.

Tsaañu’mitya, tsaave detiñu’mitya chachilla bain tsaren deechu tadeeyu, muba lalanu firuken chundejutyuve. Tsejmitya laabain tsaren bale deeyu chachi de’mitya debuudishu juntsaya tikenuu juñuba pude deeyu.

Tsandikeyanu juve, indigenala judeewashu juntsala vee vee dejuyu, tsenmiren vee vee pebulu chukeyave mantsa lamaa keesha, pijuu keetala, fe’sha bain, tsejmitya tukuraa chukeyave.
Naciones Unidas, tsamantsa sunden depave, umaa indigenala' pebululaba ura' chunu dejuve tyatu, tsejmitya entsa kiikanu naatiñuba tsaingishu juntsaa veta' veta' ayudadeke’ tsai ura'dechunu jukeyave.








Art. 1

Indigenala bain deechu tadeeyu manbelaa pebulunu chumula, naa maalli juu bain, naaken chunu tenñuba pude deeyu, yumaa entsa paate demideeve, Naciones Unidas, main kiika ke' detsuuñu'mitya.

Art.2
Chachilla bain naaken denñuba kenuu dejuyu, tsenmiren fibaa rukulaba paree judeeyu, tsejmitya chachilla deeve ti' na'baasa kenu dejutyu, naa vee vee ju'ba tsaren jude'mitya.

Art. 3

Chachilla ju'ba naakenu tenñuba tsaginu pude deeyu, main kiika tsaama tsunañu'mitya laabain naaketaa lushi katanu ju'bain, debuudi' chunu ju'bain, tyeengenchuunu juñuba juntsaayaa kenu.

Art.4

Cha' pebulu jumula bain tsaren deechu tadeeyu naaju chundenñuba, muchiba manda-ikutinjutyu, laaba laatene urajtuu junmala depaviike' ura'manu dejuyu, tsaaren tsangen chunu lushi junu tsuve.

Art. 5
Chachilla' pebulu naajuñuba kuidangenu, tsemiren naaketaa ura' kenu ju'ba tsangenu jukeyave: balela'paate, ley paate, lushi paate, debuudi' chunu paate, enstandi pamiya fibaa chachilla naadejuñuba tsangeñugituren, lala naa naa ken chumu deju'ba manbashinjutyu.

Art.6

Naaju chachillaba mumu pundene juunu.

Art. 7
1. Indígena chachi ju'ba chunu deechu tadeeyu, tsaalaba baleelañu ti' na'baasa kenchunu dejutyuve

2. Indigenala bulu chunu pude deeve muchiba bulla jutyu chunu, na’baasa ikutin chun jutyu, lala' kaillalanu dekalare’ vee tenatala eren dejutyu.

Art. 8

1. Indígena chachilla judeewashu juntsala lastemaa chunu deechu tajdetuyu, muba lalanu naakenchumu deeñuba juntsa demanbashdei tinu dejutyuve.

2. Uni judeshu juntsala naakitaa daatadinuu kenu juñuba tsanginu juve.

a) Tike’ba chahillalachi ura’tuuya kinjutyuve, Tinaaju juuñuba kayu ura’ ke’ jimishtinu juve.

b) Tyeengenu ke’ba chachillachi: tu paate, chi paate kayu vera bain machipakinuuya kinjutyuve.

c) Lu’tsa’ tenanu dechuren firukendu vee mujtu demangalare’ me-ee -eekinu pudejdetuve.

d) Tinuba detsamijasa detyañuba, manda juuchiya tsaikeyan jutyuve.

e) Tsajutyu'baasa tsadeeve ti' muba chachillanu na'baasa pas neneinu pudejdetuve.

Art. 9

Indigenala deechu tadeeve, nuka tenatala chunu tenñuba, vee pebulutala chunu tenñuba, tsaaren junga tsana’ba naaken chumu ju’ba tsaren ken chunu. Tsadenañuba muba na’baasa panu dejutyuve.

Art. 10

Indígenala’ chunu tutalaya, muba merendetyu mangalarenu pudejdetuve veemujtu me-eenu. Entsaa ginuuba juu faañuya, tu duvenilaba kuinda dekitu chachillaren tsaiñu urave detishu juntsaya, veemujtu miji’ machunu detsuve. Tsaaren yala' demalu' mijinmitya lushi paanginu detsuve.Tsaaren manen bene juntsa tenanu maja’ba machunaaba juñuya.

Art. 11

1. Chachilla bain deechu tadeeve, tinaajuu miju'bain demamijakaanu: tyeengenchumu deju'ba, matsunu paate, miruku paate, titala keengenchumu ju'ba, tsenmiren tinbu rukula' chunu tena tala kuidangenu, tsangenuuba faañuya, Tsenmiren chachilla kerajtu pebulusha depeñuba yala’ tusha mandaanu pude deeve.

2. Uñi judeeshu juntsala chachilla' chunu tenatala tu demushakiñuu dekishu juntsaya naakitaa ura' mandiñuu juñuba, indigenalaba kuinda kenuu detuve.



Art.12

1. Chachilla bain tsaren deechu tadeeve, naaken chunu ju'ba : lala tyegenchumu ju'ba, matsunu paate, miruku paate, titala keengen chumu deju'ba, tsenmiren yumaa tinbu rukula kusas juu mengaandala kuidangenu, kamanbaateya naa chachi vee tupaatesha peyaiñuba mandaanu pude deeve.

2. Tsejmitya Uni, jumula tsantsaya kiika dekimishti' tinbu rukula' tananu tsumi, naa cha' pemu juu mandaanu dekiñuba kuinda deke’ tsai shuwatu nuka mandaanu detya’ñuba me-eekanu pudeve.

Art. 13

1. Chachilla bain pude deeve, naake, tawaasha kenuu juñuba tsange’ kuida genu. Challa awamulanu kaspee tinbutalaya entsaa chukeyamuve ti panu, ti palaachi pamu ju’ba, naaju jalli juuya panmu deju’ba, naaketa piiken chumu deju’ba, tsenmiren tsandikeyanu juve. Cha’ mumu, tena mumu, pudeeshu juntsalanu tsaa tsangaanu.

2. Balela (Uñi), naaketaa chachillanu na’baasa kinjutyuu juñuba juntsaaya kenu juve. Tsenmitya naaju bale rukulaba chachillanu firu’kikinuuya kindejutyuve.

Art. 14

1. Chachilla bain pude deeve: nai keetadiñaa kiika keewaanu yasha ura’ dejisa detyashu juntsaya tsanginu dejuve, tsenmiren lala’ palaachi tene mijakaanu deeve.

2. Chachilla’ kaillalabain tsaren deechu tadeeve, ti’baasa, kiika mijanu paate juutala bain, tsenmitya indigenala’ kailla deeve tinu dejutyuve, naa nuka kiika demijanu detyañuba.

3. Uñi (bale) rukula chachillaba dekuinda kitaa, kaillalanu naakenu juñuba panu detsuve. Naa lu’tsa’ tenanu chutyu, veemujtu pebulutala dechu’ba kiika mijanu dejuve, tipalaachi pamu deju’bain.

Art. 15

1. Vee vee indigenala dechu’bain tsaren deechu tadeeve, tsaaren vee vee keengen chumu deeve, tinbunu kuinda paate bain paree jutyu. Tsenmityaa entsa kuinda juyushu juntsa faawarenu juve, kumuinchi demijakaanu.

2. Kumuinchi Uñi tukuraa chumula indigenalanu ayudangenu dejuve:naakiñaa ura’chunu deeñuba, na’baasa ken chundejutyu, tsemin vee vee pebuluutala bian ura’ junu kumuinchiren

Art. 16

1. Chachilla bain naaketaa kuinda faawarenu ke’bain lala’ palaachiren depa’ demijakaanu pude deeve Tsadeeñu’mitya chachillanu tsanaidala pakaanu pudejdetuyu tinu dejutyuve.

2. Bale rukula, entsanginu dejuve, nutala radio dechuñuba jundala indigenala panu pude deeve, tinu detsuve,tsenmitya naaju indigenalaba tsanaidala panu pude deeve. Tsejmitya naaju radio-talaba taawasha kimula indigenala dechuve,yaibain panu pude deeve ti’ kuinda faaware’ jijiinu dejuve.

Art. 17

1. Maalli juu, pebulunu bulu chunamula bian, sunden chunu deeve, tsenmin naa taawasha kenu ju’ba pude deju nuka tu paateshaba.

2. Indigenala’ pebulutala panmalaya Uñi judeeshu juntsala, lala’ kaillalanaa kayu den keetananu dejuve: kaillalanu taawasha kikarenjutyu tsangendu lastemaiba inu dejuve. Yala’ kiika keenu uranu tsangikaamalaya urajtuve, naa mijtuba awanu detsuve. Tsejmitya kaillalachiya kiikaa mijanaa deechu tadeeve.
3. Chachillaba deechu tadeeve, nuka taawasha kesnendetsuñuba muba firu’ mandagen dejutyuve, tsejmiren lushi bain ura’ panginu dejuve.

Art. 18

Chachillaba deechu tadeeve, tikeenuu juñuba veelaba dewa’di’ depaviikenu, tsaatala patinuu jumula laachi bain balela dejuve, Yala tsandinu detsuve, entsagiñaa uranu juve ti’ ajkesha miya’ jindetsuve.

Art. 19

Uñi judeeshu juntsala tiba gujityumujchiren pake’meenu detsuve,laachi naajulaa bale ruku dechuñuba, yaiba dekuinda deke’ dedyatu mawainu detsuve, tsenmala pebulula uraa detinmala tike’jinuu juñuba kindetsuve.

Art. 20

1.Chachillaba deechu tadeeve, naakitaa tsaa tsananu ju’ba, tsenmiren laachi bale ruku jumula naakiñaa katawanuu juñuba talaimishtinu dejuve: lushi paate, bulu dechunu. Tsangishu juntsaa kumuinchi naake taawasha ken chundya’ba kinu dejuve

2. Indígena pebulula tiba tajtu malastemaa chudenashu juntsala bain tsaren deechu detave, veela naaju dechuñuba tsaanu dejuve.

Art. 21

1. Chachillanu muba na’baasa kindejutyuve, ura’ chunu detsuve, tsai kiikaa mijanu, taawasha kenu, tsenmiren demija’ pullandala kayu mamijanu kiika paatela, kamanbate ya kimijanchi, dilu paatebain kayu vera mijanu deeve. Tsaita lushi katan chunu detsuve.

2.Tsejmitya Uñi, naakenuu juñuba mijanu juve,chachilla naa-itaa kayu ajkesha lushi paate katanuu dejuñuba. Tsenmiren entsa paate kayu aakeetadinuu juve entsaa chachillanu: rukulanu, shinbulanu taawasha kenjutyuulanu, supulanu, unalanu, pannalanu, kaillalnu,mantsa kapuka, neepa, tyaapa putyuulanu bain

Art. 22

1. Kayu denkeenanu jumiya rukulanu, shinbulanu, umaa awaintsumulanu, kaillalanu bain tsenmin mantsa lastemaa chumulanu kayu den ayudangenu juve.

2. Uñi entsaayaa kina juve, indigenalaba debuuditu; supula, kaillala’mitya tiba firu' injuutyu, sunden chunanuuya kinuu dejuve.

Art. 23

Cha'pebulubain tyeengenu tya'ba tsanginu pude deeve,tsenmin naaketaa kayu ura'kenuu ñuba kiika main kinu dejuve, tsangishu juntsaa chachillaba yaitene naakinutya'ba mijanu dejuve, dilu paate, ya kinuu paate tsenmin yalaren taawasha kinu dejuve.




Art. 24

1. Indigenlabain dilu'matsatiyanu tsumi tape talanu deechu tadeeve, tsenmiren naaken chumu ju'ba tsangenchunu: dilu paate,tsaaren meneste imulanu kuidangenu: chi, tape,animaa, tutainsha tsumulanu bain Tsejmitya indigenalanu mijturen tsangindetsaa tinu dejutyuve.

2. Chachilla bain deechu tadeeve, sunden chunu, paree juunu, dilu'tu tene chunanu. Tsejmitya Uñi, entsaatala kayu denkeedinu juve.

Art. 25

Chachilla tinu keengen chumu deju'ba juntsanu kayu daran tanñuu ginu dejuve; tu paate, pi paate, lamaa pi keetala kalen dechujmitya kuidangenu jukeyave, challa ma-awamula bene ura'chunu detsuve.

Art. 26

1. Tu juushu juntsa, chi judeeshu juntsa laachi deeve, entsa tusha yumaa chachilla tsanamude'mitya.

2.Chachilla deechu tadeeve, tyeengenu tya'baIn tsenmin tu,chi,kayu vera jumulanu kuidangenu dejuve. Tsandimiya tu juushu juntsa chachillachi tene juuve.

3. Bale ruku jumula entsaya kenuu dejuve, chachilla tu duveni judeeñu'mitya kiika ke'kunu detsuve, muba bulla kindejutyu, chachilla naaken chumu deju'ba tsaa chunu detsuve.

Art. 27

Balela naakiñu urañuba tsangenu dejuve, cha’ pebulula naaken chumu deeñuba juntsaa talaya ta’kandejutyuve, na tu paatetalaba, tsaaren main tu taturen kiika tajtushu juntsaya kunu dejuve. Tsejmitya chachilla bain tsaren deechu tadeeve.

Art. 28

1. Chachilla bain deechu tadeeve, tutala na’baasa dekiñu, chi millangare’ dekuñu, laabain ajaapanu pude deeyu, tsange’ kuwamulanu lushi kanu mas tsangen chun dejutyu cha’ tutala.

2. Mantsa chachilla, vee balelanu mijakaatyumujchiba tu demuske’ dekuwañu tsangenmitya lushi kanu pude deeve, tsangityumiya chi mawajnu mandagenu dejuve.

Art. 29

1. Lala’ tu juushu juntsa kuidangenu dejuve, tsangishu juntsa ti puka wajke’ba ka’fin chunu detsuve. Tsaañu’mitya tsaanu keenamu bale rukula kayu naakinuu juñuba chachillanu kuindadeke’ narake mijakaanu dejuve,lala’ chunu tenatala tu mushkenjutyu.

2. Tsenmin tutala mushakinuu pi juuya cha’ chunu tenatala waadagaren dejutyuve, chachilla merendetyuya.

3. Cha’ chunu tenanu tsaayaaba benenu pi juu deyuukepuñu dilu’ba indetsushu juntsaya. Uñi, jeke mandagenu juve, chachillanu remedyu dekikaanu, tsenmiren junu chumu chachillanu naa-indetsuñuba dilulanu keetadinu mandagenu juve.

Art.30

1. Chachilla’ tutala suutaduula devi’ aikemijaiñugen chunu dejutyuve.
Yala tsai junu devi’ dechuñaa chachilla ura’ chukeenu juve ti’ba depañuya jundala vi’ chunu dejuve.

2. Uñi, chachillanu pake’meenu juve, lala’ bale rukulanu, ñulla’ tusha suutaduula devija’ chunu pudenu dejun ti’ pake’meenu juve.

Art. 31

1. Chachilla deechu tadeeve, tiba kuidagenu yumaa tinbu rula’ tananu tsumi, tyeengen chumu ju’ba, chachi paate, ñi paate, remedyu paate kayu vera bain, Tsejmitya lala tinaaju mideju’ba juntsa kuidangenu tsamatsa baleñu’ mitya.

2. Uñi, chachillaba kuinda dekitu, entsadeeñu mija’ mitya, ñullanu naadejuñuba tsaa tsananu tsuve tinu juve.

Art. 32.

1. Chachilla tinaaju kayu daran meneste inuu juñuba, tsaatala kiika kenu dejuve, tsange’ lala’ tutala taawashakenuu juve.

2. Cha’ pebululaba mantsa menesteginaaba dejushu juntsaya Uñi, pake’meetu uraa detinmala kiika ke’tsuunu detsuve, ti kenu detya’ba tsaaren lala’ tutala, chunu tenatala, pulla kalareke, tutainsha tsumu dekalaañu firu’ injutyuñuya. Uranu juve.

3. Tsejmitya bale ruku jumula mijanu dejuve, naakitaa lala’ tutala jayu ura’ mandinuu juñuba jayaa matsatiwaanu kenu palaa panu dejuve.

Art. 33

1. Chachilla naaju ju’ba tsaanu detsuve, naaken chumu ju’bain, tyeengemu deju’ba. Tsaa dechuñuba muba firu’ pandejutyuve.

2. Chachilla bain tsaren deechu tadeeve, naakita baleruku dekalare’ ajkesha mija’jinu deeñuba pude deeve.

Art. 34

Chachilla bain entsangenu pude deeve: naakita ura’chunuu juñu bain, tyeengen chumu deju’ba. Tsenmiren titala talainu mideju’ba tsaatala talainu dejuve. Yumaa tukura entsa kiika tsunañu’mitya.

Art. 35

Chachilla bain deechu tadeeve, yala’ chunu tenatala muba mandagindetyuren entsanataa ura’ chukeenu juve, ti’ panu bulu chumutalaya.



Art.36

1. Indigenala tukuraa dechuyu, tsaren juntsa tu devela deeve nuka paateshaba tsaaren dechuve, naa-na’bain kuinda kee juukeyanu juve.Vee vee pebulutala dechubain tiken chumu deju’ba tsangenchunu pude deeve.

2. Uñi, jumula pake’meenu dejuve, tinaaju talaa ayudangenu ju’ba, tsenmiren naakita entsa kiikanu naatiñuba tsange ke’ jinu ju’ba.

Art. 37

1. Indigena chachilla deechu tadeeve, entsa kiika tyeengenuu juñuba tsangenu tinu, tsenmin ura’ mangenuuba juñuya mannu. Tsaaren Uñi, tsadekiñuba urave tinu tsuve.

2. Enu naati depa’ depiikiñuba, muba urajtuve ti’ panu dejutyuve, ne magaapuke, mamushakinuuba kindejutyuve, chachilla’ paate deechu taadeeve ti’ tsaama pillaañu’ mitya.

Art. 38

Uñi, indigenala’ pebululanu depake’meenu juve, tsange’ ayudangenu tsenmiren entsa kiikanu naati depa’ depiikiñuba tsanginu juve

Art. 39

Chachillanu, Uñi lushi kuwañu kuidagemijanu, veemujtu chulla dekuñu bain tsaren jukeyanu juve, tsejmitya entsa kiikanu naadetiñuba tsanginu jukeyave.

Art. 40

Chachilla bain tsaren deechu tadeeve, tikenuujuñuba, tsenmin tinaaju peletu ****’ba Unilanu. Naa veemujtu chumu balelanu bain tsandikeyanu juve. Tsenmiren chachilla paate juushu juntsanu naakenchumu deeñuba yumaa chachilla’mitya tsaa kiika tsunañu’mitya. Naaju Unilaba tukuraa chumula na’baasa kindejutyuve.

ART. 41

Kabale rukula buunamula yaiba tsandi miruku juntsaala Naciones Unidas-sha, buunamula entsa leynu naatiñuba tsangenu detsuve,Tsejmitya naa lushi paate, tike’ba ura’jiinuuba demijakaanu detsuve. Tsadekishu juntsaa entsaa paatetala chachilla bain punu detsuve, mijañu uraa detyashu juntsaya.

Art.42

Naciones Unidas, vee vee bale rukulaba naa-uwanuba wa’di’ papatinu deshuwave indigenala' paate.
Tsenmitya balela entsa kiikanu naatiñuba juntsaaya kinu dejuve, naati depa’ depiikiñuba chachilla'mitya.




Tsandinu.

Art. 43

Challa deechu paate padetishu juntsa, yumaa tsaama juuñu’mitya, indigenala pebulutala naaju chumu ju’bain, tsaa juunu detuve, muchiba firu’tikayan jutyu kumuinchi indigenala tukuraa chumulaya.

Art. 44

Kumuinchi uraa kenu tsumi juushu juntsa paate,unbeerukula, supulabain paree judeeve, ti’ depave Naciones Unidas.

Art. 45

Tsejmitya entsa deechu paate pa’pilladekishu juntsa, muba maalli pensachi mannu jutyuve, enu naati pa’ pillañuba tsange ke’ jinu juve.

Art.46

1. Tsejmitya muba entsa ley-nu, vera mange’ tsuunu dejutyu, naa vera’ mangike, mangaapukenuu bain jutyu mu' chachillaba, tsange' dewa'di' defaawaave tinu jutyu. Yumaa Naciones Unidas, chachilla’ mitya tsange depiike’ defaawareñu'mitya entsa ley-juushu juntsa, tsamanta baleve indigenalachiya.

2. Entsa deechu pillaashu juntsa paatenu panmalaya, chachi deeshu juntsaya muba firu’ kindejutyuve. Tsejmitya entsa ley, tsaa juñu’mitya indigenalanuya tukuraa chumulanu na’baasa kindejutyuve, tsenmin laachi uraa tene juuyaa kenu detsuve naaju balelaba.

3. Entsa kiikanu chachillabain tsaren deechu detave, ti’ pillaashu juntsanu, kayu uran mannu kishu juntsaya depaviikitaa tsangenuu dejuve, tsaaren laachi urajtuuya kindejutyuve.Ti kenuuñuba paree juuya kinu, muba ura' chunuu tene juu.